Mr. Evans take time wheel him bicycle outta the front room from before 7 o’clock. If anybody ask him where him always go so early, him tell them him go look work. Him a plumber, and him nuh have no tools ’pon him, but nuh watch that. Him two pickney know better—say a more rum him gone drink. Andre leave out little after 9, gone play football before sun get too hot. Him pass Annmarie inna the front room, a use a old towel sop up the piss ’pon the linoleum floor. What is there inna this rum thing, my God, that turn big man inna little baby? Donna come over around 11 figive Annmarie a hand with the big bag o’ peas she get in from country. Donna good with the gungo for she used to sell it too—though she nuh set foot inna Coronation Market from the day she meet this guy Tony two months ago, with the good U.S. dollar like it a come outta him ears. A pure Spanish that talk, y’know. Them coulda barely understand one another, but nuh ask if him never manhandle the body. Three weeks now Donna nuh see him and she still a walk funny … and still a lick out cash.
